ព្យុងយ៉ាង៖ មនុស្សម្នាក់បានស្លាប់ដោយសារជំងឺកូវីដ-១៩ បំប្លែងថ្មីអូមីក្រុង នៅប្រទេសកូរ៉េខាងជើង ខណៈតែមួយថ្ងៃមានករណីឆ្លងដល់ជិត២ម៉ឺននាក់។
យោងតាមប្រព័ន្ធផ្សព្វផ្សាយរដ្ឋកូរ៉េខាងជើងបានឱ្យដឹងនៅថ្ងៃទី១៣ ខែឧសភា ឆ្នាំ២០២២នេះថា យ៉ាងហោចណាស់មនុស្សម្នាក់ដែលត្រូវបានបញ្ជាក់ថាមានកូវីដ-១៩ បានស្លាប់នៅក្នុងប្រទេសកូរ៉េខាងជើង ហើយរាប់រយពាន់នាក់បានបង្ហាញពីរោគសញ្ញាគ្រុនក្តៅ។
មេដឹកនាំកូរ៉េខាងជើងលោក គីម ជុងអ៊ុន បានទៅទស្សនាមជ្ឈមណ្ឌលបញ្ជាការប្រឆាំងមេរោគកាលពីថ្ងៃព្រហស្បតិ៍ ទី១២ ខែឧសភា ដើម្បីពិនិត្យមើលស្ថានភាព និងការឆ្លើយតបបន្ទាប់ពីបានប្រកាស "ភាពអាសន្នធ្ងន់ធ្ងរ" និងបញ្ជាឱ្យបិទប្រទេសកាលពីថ្ងៃព្រហស្បតិ៍។
ប្រទេសកូរ៉េខាងជើងបាននិយាយថា ការផ្ទុះឡើងបានចាប់ផ្តើមនៅក្នុងរដ្ឋធានីព្យុងយ៉ាងក្នុងខែមេសា។ ប្រព័ន្ធផ្សព្វផ្សាយរដ្ឋមិនបានបញ្ជាក់លម្អិតអំពីមូលហេតុនៃការផ្ទុះឡើងនេះនោះទេ ប៉ុន្តែទីក្រុងបានរៀបចំព្រឹត្តិការណ៍សាធារណៈដ៏ធំជាច្រើននៅថ្ងៃទី១៥ និង២៥ ខែមេសា រួមទាំងក្បួនដង្ហែរយោធា និងការជួបជុំដ៏ធំដែលមនុស្សភាគច្រើនមិនពាក់ម៉ាស់៕
